سماح أنور: "بندم كل يوم إني اشتغلت مع كاملة أبو ذكري"

كتب- وائل توفيق:

عبرت الفنانة سماح أنور عن ندمها عن العمل مع المخرجة كاملة أبو ذكرى في فيلم "يوم للستات".

وقالت أنور، أثناء استضافتها في برنامج "ضرب نار" على شاشة قناة "القاهرة والناس": "ندمت جدا الحقيقة، مركبناش مع بعض في أي حاجة، أنا زي ناس كتير قوي قوي من جيلي اشتغلنا مع ناس كتير قوي، وأنا بالذات مش زي جيلي قوي في الحتة دي، اشتغلت مع كله تقريبا، اشتغلت مع الجامدين والوحشين قوي، فأقدر أقول كويس قوي، فأنا فاهمة، وخصوصا إنني أنا متعلمة الحاجات دي، درست إخراج ومتعلمة إنتاج في أمريكا".

وتابعت: "هي مخرجة عظيمة، لكن بالنسبالي أنا ندمت إني اشتغلت معاها، مش عشان الموضوع بتاع يوم للستات بجد، لأ، لحد ما خلصت الفيلم، كنت بندم كل يوم، وكملته لإني اتفقت على شئ لازح أخلصه، لكن أنا فعلا بتندم بيني وبين نفسي كل يوم، هي شالت الدور كله ومحدش بلغني، وهي أرهقتني جدًا على مدى سنتين، أنا حلقت شعري زيرو، وكان بعد كده بيطول شوية بنصبغه أبيض، وده ليه، أنا ميهمنيش، إلهام شاهين المنتج، هي مالها، المنتج ميقدرش يقول للمخرج اعمل إيه، إلهام شاهين بسبب كاملة أبو ذكري تصور على سنتين، وإلهام لا تجرؤ تقول ده، أنا مبشوفش إن ده شئ بروفيشنال".

"يوم للستات" إنتاج عام 2016، تأليف هناء عطية، بطولة إلهام شاهين، محمود حميدة، فاروق الفيشاوي، هالة صدقي، نيللي كريم، ناهد السباعي، رجاء حسين، إياد نصار وأحمد الفيشاوي، ومن إخراج كاملة أبو ذكري.