دينا فؤاد تكشف أسرار صداقتها القوية بإيمان العاصي وإيناس كامل

كتب- وائل توفيق:

كشفت الفنانة دينا فؤاد عن صداقتها القوية بالفنانتين إيمان العاصي وإيناس كامل.

وقالت فؤاد، أثناء استضافتها في برنامج "كلام الناس" على شاشة قناة "mbc مصر": "إيناس كامل أول ما شفتها كان في ترابيزة بروفات الدالي، أنا كنت واقفة ولقيتها بتقولي، تعالي اقعدي جنبي، قعدت جنبها، لقيتها بتقولي هنبقى أصحاب أنتيم، قولتلها ليه بتقولي كده، قالتلي إحساسي، فيكي شبه من صاحبة عمري اسمها أميرة، فأنا حاسة إن أنا وإنت هنبقى أصحاب أنتيم، وقد كان، أنا وإيناس توأمين متلاصقين من 2007، عمر ما حصل بينا مشاكل، بنحب بعض جدا، مفيش بينا غيرة، بنحب بعض أوي، مامتها بتقولي إنت اللي بنتي مش إيناس، لإني أنا نفس برج مامتها فمتفاهمين أكتر".

وتابعت: "إيمان العاصي بعد إيناس بشوية، بس بجد بحس إن إيمان أختى التي لم تلدها أمي يعني، أصحاب جدا وقريبين من بعض، وفترة من الفترات إيمان وقفت جنبي في أزمة في حياتي، ووقفت جنبي جامد، بتنزلي الساعة 3 الفجر، وبتلف بيا بالعربية تسمعني أغاني، مبنغيرش من بعض، مرة كنت في (اللي مالوش كبير) فهي بتكلمني وواقف جنبي مدير التصوير أحمد زغلول والمؤلف عمرو محمود ياسين، فشافوا إيمان العاصي بتكلمني بتقولي هنروح ناكل سوشي امتى، قولتلها يلا، أحمد زغلول قالي نفسي أعرف أنتوا الاتنين أصحاب إزاي، مبتغيروش من بعض، قولتله ولا عمرنا نغير من بعض، أصحاب وأصحاب جدا كمان، فعمرو قالي بجد علاقة مش مصدقها، ولا بنافس بعض ولا بغير منها ولا بتغير مني، بل بالعكس نشجع بعض جدا، لما تعمل حاجة حلوة بقولها برافو، أشوفها لابسة حاجة حلوة أقولها دي تخصني هاخدها ألبسها، يعني أصحاب وأكتر من أصحاب كمان".

جدير بالذكر أن آخر أعمال دينا فؤاد، كان مشاركتها في فيلم "200 جنيه" إخراج محمد أمين، وبطولة مجموعة ضخمة من نجوم ونجمات الفن، بينهم: إسعاد يونس، ليلى علوي، صابرين، غادة عادل، أحمد السقا، أحمد آدم، أحمد السعدني، أحمد رزق، خالد الصاوي، محمود حافظ، مي سليم، نرمين زعزع، هاني رمزي.